دوغلی پالیسی: بھارت کے شہری روسی فوج میں ملازمتیں کر رہے ہیں

یوکرین کے خلاف جنگ میں روسی فوج کے ساتھ مل کر اگلے محازوں پر لڑائی لڑ رہے ہیں
لندن(وار رپورٹر) برطانوی اور یورپی میڈیا کے مطابق بھارت کی وزارت خارجہ نے آج جمعہ کے روز اس بات کی تصدیق کی ہے کہ کچھ بھارتی شہری روسی فوج کے ساتھ “سپورٹ جاب” کر رہے ہیں۔ وزارت خارجہ کا کہنا تھا کہ وہ ان بھارتی شہریوں کی بحفاظت واپسی کے لیے ماسکو کے ساتھ مل کر کام کر رہی ہے۔ بھارتی روزنامے ہندو کی ایک رپورٹ کے مطابق روس کی یوکرین کے خلاف جنگ کے اگلے محاذ پر 18 بھارتی شہری مختلف سرحدی شہروں میں پھنسے ہوئے ہیں۔
اخبار کی رپورٹ کے مطابق کم از کم تین بھارتی شہریوں کو روسی فوجیوں کے شانہ بشانہ لڑنے پر مجبور کیا گیا۔ وزارت خارجہ نے اس بات کی تصدیق نہیں کی کہ بھارتی شہریوں نے روس اور یوکرین کے مابین تنازعے میں جنگی کردارادا کیا ہے۔ لیکن وزارت نے اپنے بیان میں کہا کہ اسے “معلوم ہے کہ چند ہندوستانی شہریوں نے روسی فوج میں معاون ملازمتیں اختیار کی ہیں۔”رپورٹ کے مطابق ماسکو پہنچنے پر ان بھارتیوں کو مبینہ طور پر”روسی فوج نے اسلحہ اور گولہ بارود” سنبھالنے کی تربیت دی اور بعد میں انہیں جنوری میں فرنٹ لائنز پر بھیج دیا گیا۔ اخبار کے مطابق جب کہ کچھ بھارتی شہریوں نے مبینہ طور پر موجودہ تنازعہ میں یوکرینی افواج کے لیے رضاکارانہ خدمات انجام دیں، یہ بھارتی شہریوں کی جانب سے یوکرین کی طرف سے جنگ میں مبینہ شمولیت کا پہلا معلوم واقعہ ہے۔ ان میں سے ایک شخص نے اخبار کو بتایا کہ وطن واپسی کے لیے اس کی “بار بار کی درخواستوں” پر ماسکو میں بھارتی سفارت خانے نے “دھیان” نہیں دیا۔

اس خبر پر اپنی رائے کا اظہار کریں

اپنا تبصرہ بھیجیں