طیارے کی ہنگامی لینڈنگ کے بعد مسافر کو اسپتال منتقل کردیا گیا، تاہم مسافر کی شناخت ظاہر کی گئی اور نہ ہی خودکشی کرنے کے بارے میں کچھ بتایا گیا
ایوی ایشن رپورٹر
لندن: بینکاک سے لندن آنے والی پرواز کے دوران مسافر نے خود کشی کی کوشش کی جس پر طیارے کو ہنگامی لینڈنگ کرنا پڑی۔ جہاز کے باتھ روم میں خودکشی کی کوشش میں زخمی ہونے والے مسافر کی جان طیارے میں موجود ڈاکٹر نے طبی امداد فراہم کرکے بچائی۔طیارے کی ہنگامی لینڈنگ کے بعد مسافر کو اسپتال منتقل کردیا گیا جہاں اس کی حالت تشویشناک بتائی جا رہی ہے تاہم مسافر کی شناخت ظاہر کی گئی اور نہ ہی خودکشی کرنے کی وجہ کے بارے میں کچھ بتایا گیا۔
ہیتھرو ایئرپورٹ انتظامیہ کا کہنا ہے کہ ایوی ایشن نے واقعے کی تحقیقات کے لیے ایک انکوائری کمیٹی تشکیل دیدی ہے جس کی رپورٹ آنے کے بعد میڈیا کو آگاہ کردیا جائے گا۔ایوا ایئر لائن کی انتظامیہ نے واقعے کی تصدیق کی لیکن تفصیلات فراہم نہیں کیں اور نہ ہی واقعے پر تبصرہ کرنے کی درخواستوں کا جواب دیا۔
