’مسجد کو دھماکے سے اڑانے‘ کی دھمکی پر برطانوی خاتون کو جیل

چیشائر کی رہائشی 53 سالہ جولی سوینی کو ایک ’مسجد دھماکے سے اڑانے‘ کا آن لائن پیغام پوسٹ کرنے پر 15 ماہ قید کی سزا

ڈاکٹر اختر گلفام

لندن: ایک خاتون کو ’مسجد دھماکے سے اڑانے‘ کا آن لائن پیغام پوسٹ کرنے کا اعتراف کرنے پر 15 ماہ قید کی سزا سنائی گئی ہے۔

53 سالہ جولی سوینی نے تین اگست کو چرچ لاٹن، چیشائر میں واقع اپنے گھر سے مقامی کمیونٹی کے فیس بک گروپ پر یہ تبصرہ کیا، جس کی اطلاع بعد میں پولیس کو دی گئی۔

ایک تصویر، جس میں بہت سے سفید فام اور ایشیائی افراد کو ساؤتھ پورٹ میں ہونے والے پرتشدد واقعات کے بعد صفائی کی مہم میں شریک دکھایا گیا تھا، پوسٹ کرنے کے بعد جولی سوینی نے پوسٹ کیا: ’یہ بالکل مضحکہ خیز ہے۔ مساجد کی حفاظت نہ کریں۔ مساجد کو اس وقت دھماکے سے اڑا دیا جائے جبکہ اس میں بالغ افراد موجود ہوں۔‘

انہوں نے بدھ کو چیسٹر کراؤن کورٹ میں موت یا سنگین نقصان پہنچانے کی دھمکی پر مشتمل ایک پیغام بھیجنے کا اعتراف کیا۔

سزا سناتے ہوئے چیسٹر کے اعزازی ریکارڈر جج سٹیون ایورٹ نے کہا: ’مجھے نہیں لگتا کہ کوئی یہ تجویز کر رہا ہے کہ ملزمہ خود اس میں شامل ہوتی لیکن ان جیسے نام نہاد کی بورڈ جنگجوؤں کو اپنی زبان کی ذمہ داری لینا سیکھنا ہوگا، خاص طور پر ملک بھر میں جاری بدنظمی کے تناظر میں۔‘

اس خبر پر اپنی رائے کا اظہار کریں

اپنا تبصرہ بھیجیں