’یہ اگلی نسل کا وقت‘ ہے: نائب کپتان معین علی عالمی کرکٹ سے ریٹائر

انگلش آل راؤنڈر نے آسٹریلیا کے خلاف وائٹ بال سیریز میں نظر انداز کیے جانے کے بعد انٹرنیشنل کرکٹ سے ریٹائرمنٹ کا اعلان کر دیا

ڈاکٹر اختر گلفام ایڈیٹر انچیف نوائے وقت

لندن:انگلینڈ کرکٹ ٹیم کے آل راؤنڈر معین علی نے آسٹریلیا کے خلاف آئندہ وائٹ بال سیریز میں نظر انداز کیے جانے کے بعد انٹرنیشنل کرکٹ سے ریٹائرمنٹ کا اعلان کر دیا۔

37 سالہ معین نے انٹرویو دیتے ہوئے کہا کہ یہ ’اگلی نسل کا وقت‘ ہے۔

’مجھے یہ محسوس ہوا کہ (ریٹائرمنٹ کے لیے) یہی وقت صحیح تھا۔ میں نے اپنے حصے کا کام کر دیا ہے۔‘

انہوں نے مزید کہا کہ وہ اب بھی محسوس کرتے ہیں کہ وہ اعلیٰ سطح پر کھیل سکتے ہیں، لیکن اپنے بین الاقوامی مستقبل کے بارے میں ’حقیقت پسند بننے کی کوشش‘ کر رہے ہیں۔

معین نے بتایا: ’میں انگلینڈ کے لیے دوبارہ کھیلنے کی کوشش کر سکتا ہوں لیکن میں جانتا ہوں کہ حقیقت میں، میں ایسا نہیں کروں گا۔‘

انہوں نے انگلینڈ کے لیے 68 ٹیسٹ، 138 ایک روزہ اور 92 ٹوئنٹی 20 انٹرنیشنل کھیلے اور ملک کے لیے وائٹ بال فارمیٹ کے دونوں ورلڈ کپ جیتنے میں اہم کردار نبھایا۔

میتھیو موٹ کو گذشتہ ماہ ون ڈے اور ٹی ٹوئنٹی ورلڈ کپ کے ٹائٹل کے دفاع میں مایوس کن ناکامی کے بعد انگلینڈ کی وائٹ بال ٹیموں کے ہیڈ کوچ کے عہدے سے برطرف کر دیا گیا تھا جب کہ معین اور جونی بیئرسٹو کو آسٹریلیا کے خلاف سیریز کے لیے سکواڈ سے ہٹائے جانے کے بعد انگلش کرکٹ بورڈ کی مزید تبدیلی کی خواہش عیاں ہوتی ہے۔

معین حالیہ برسوں میں جوس بٹلر کے بااثر نائب کپتان رہے۔

اس خبر پر اپنی رائے کا اظہار کریں

اپنا تبصرہ بھیجیں