سوات: غیرملکی سفرا کی سیکیورٹی پر مامور پولیس وین کے قریب دھماکا، ایک اہلکار شہید

مالم جبہ روڈ پر واقع جہان آباد کے علاقے میں پولیس وین میں دھماکا ہوا، دھماکے میں پولیس کی گاڑی کو بھی شدید نقصان پہنچا

نوائے وقت رپورٹر

سوات :سوات کے علاقے جہان آباد میں پولیس وین میں دھماکے کے نتیجے میں کم از کم ایک اہلکار شہید اور تین زخمی ہو گئے جہاں رپورٹس کے مطابق حملے میں غیرملکی سفرا کے قافلے کو نشانہ بنایا گیا جس میں وہ محفوظ رہے۔

سوات میں مالم جبہ روڈ پر واقع جہان آباد کے علاقے میں پولیس وین میں دھماکا ہوا جس کے نتیجے میں چار اہلکار زخمی ہو گئے۔

زخمی اہلکاروں کو فوری ہسپتقل منتقل کیا گیا جہاں دوران علاج ایک اہلکار زخموں کی تاب نہ لاتے ہوئے دم توڑ گیا۔

شہید اہلکار کی شناخت کانسٹیبل برہان کے نام سے ہوئی ہے جبکہ زخمیوں میں سب انسپکٹر سرزمین، کانسٹیبل امان اللہ اور کانسٹیبل حبیب گل شامل ہیں۔

برطانوی خبر رساں ایجنسی رائٹرز کے مطابق سوات کے ضلعی پولیس افسر زاہد اللہ خان نے بتایا کہ سفارت کار مقامی چیمبر آف کامرس کی دعوت پر وادی سوات کے علاقے کا دورہ کر رہے تھے۔

انہوں نے بتایا کہ پولیس کا جو دستہ قافلے کی قیادت کر رہا تھا، وہ سڑک کے کنارے نصب بم سے ٹکرا گیا جس کے نتیجے میں ایک اہلکار شہید اور چار زخمی ہو گئے۔

پولیس نے ڈان ٹی وی اور نوائے وقت کو بتایا کہ قافلے میں موجود تمام تقریباً درجن سفارت کار محفوظ تھے اور واپس اسلام آباد جا رہے ہیں۔

ڈپٹی انسپکٹر جنرل آف پولیس محمد علی گنڈا پور نے رائٹرز کو اس بات کی تصدیق کرتے ہوئے بتایا کہ تمام سفیر حملے میں محفوظ رہے اور اسلام آباد روانگی سے قبل انہیں محفوظ مقام پر منتقل کر دیا گیا تھا۔

اس خبر پر اپنی رائے کا اظہار کریں

اپنا تبصرہ بھیجیں