نور فاطمہ افضل ڈان ٹی وی
لاہور: علامہ اقبال انٹرنیشنل ائرپورٹ پر کسٹمز نے میاں بیوی سمیت پی آئی اے کی ائرہوسٹس کو کروڑوں روپے مالیت کے اسمارت فونز اسمگل کرتے ہوئے پکڑ لیا۔
بیرون ملک سے اسمگل کیا گیا بھاری مالیت کا سامان لاہور ائرپورٹ پر چیکنگ کے دوران پکڑا گیا، جس پر کسٹمز کلیکٹر علی عباس گردیزی نے کامیاب کارروائی پر عملے کو شاباش دی۔
حکام کے مطابق دبئی سے آنے والے مسافروں اور پی آئی اے کی ائرہوسٹس سے اسمگل شدہ سامان برآمد ہوا۔ پرواز پی کے 204 کے مسافر میاں بیوی اور ائرہوسٹس سے درجنوں موبائل فونز اور لیپ ٹاپ ملے۔ اسمگل شدہ سامان کی مالیت تقریباً 2 کروڑ بتائی جاتی ہے۔
حکام نے اسمگلنگ کرنے والی ائرہوسٹس اور مسافروں کے خلاف مقدمہ درج کرکے کارروائی شروع کردی ہے۔
موبائل فون اسمگل کرنے والی پی آئی اے ایئرہوسٹس معطل
فائل
اسلام آباد: پاکستان انٹرنیشنل ایئر لائن (پی آئی اے) نے کہا ہے کہ کسٹم حکام کی جانب سے لاہور ایئرپورٹ پر موبائل برآمد کیے جانے کے بعد ایئرہوسٹس کو معطل کرکے ان کے خلاف محکمانہ کارروائی شروع کردی گئی۔
ترجمان پی آئی اے کی جانب سے پی آئی اے ایئر ہوسٹس سے لاہور ایئرپورٹ پر کسٹم حکام کی طرف سے موبائل فونز برآمد کرنے کے معاملے پر جاری بیان میں کہا گیا ہے کہ پی آئی اے کی متعلقہ ائیر ہوسٹس قومی ائیر لائن کی دبئی سے لاہور کی پرواز پی کے 204 پر تعینات تھیں۔
انہوں نے کہا کہ لاہور ائیر پورٹ پر کسٹم حکام کی طرف سے کارروائی کے نتیجے میں ائیر ہوسٹس سے قیمتی موبائل فونز برآمد ہوئے، پی آئی اے انتظامیہ نے ائیر ہوسٹس کو فی الفور معطل کر کے محکمانہ کاروائی شروع کر دی ہے۔
