رواں برس 17 ٹی20 مقابلوں میں شکست ،انڈونیشیا ، عمان، ، مالدیپ، منگولیا، میانمار، نمیبیا اور نیپال کی ٹیمیوں سے بھی گئی گزری ٹھہری
ڈاکٹر اختر گلفام ایڈیٹر انچیف نوائے وقت
لندن :پاکستان کرکٹ ٹیم سال 2024 میں ٹی20 انٹرنیشنل میچز میں سب سے زیادہ شکست کھانے والی ٹیم بن گئی۔
برطانوی چینل ڈان ٹی وی ایک جائزے کے مطابق سال 2024 میں پاکستان کرکٹ ٹیم 17 ٹی20 انٹرنیشنل میچز میں ناکامی سے دوچار ہوئی، دوسرے نمبر پر انڈونیشیا کرکٹ ٹیم رہی جس نے 15 میچ میں شکست کا سامنا کیا جبکہ عمان کی ٹیم 13، مالدیپ، منگولیا، میانمار، نمیبیا اور نیپال کی ٹیمیں 12 ،12 مرتبہ شکست سے دوچار ہوئیں۔
اعداد و شمار کا جائزہ لیا جائے تو پاکستان نے سال 2024 کے دوران مجموعی طور پر 27 ٹی20 انٹرنیشنل میچز کھیلے جن میں سے محض 9 میں پاکستان کرکٹ ٹیم کو فتح نصیب ہوئی،17 میچز میں پاکستان کو ناکامی کا سامنا کرنا پڑا، اس میں امریکہ کے خلاف عالمی کپ میں ٹائی ہو جانے والا میچ بھی شامل ہے۔
قومی ٹیم کو سپر اوور میں میزبان ٹیم کے ہاتھوں ناکامی کا سامنا کرنا پڑا تھا، پاکستان کے ایک ٹی20 انٹرنیشنل کا نتیجہ سامنے نہیں آ سکا تھا، بارش کی وجہ سے پاکستان کے 2 ٹی20 انٹرنیشنل میچز کا ٹاس ہی نہیں ہوسکا تھا اس لیے وہ ریکارڈ کا حصہ نہیں بنے۔
واضح رہے کہ آئی سی سی ٹی20 عالمی رینکنگ میں پاکستان کا 7واں نمبر ہے، بھارت پہلی پوزیشن پر فائز ہے جبکہ آسٹریلیا دوسری، انگلینڈ تیسری، ویسٹ انڈیز چوتھی، نیوزی لینڈ پانچویں، جنوبی افریقا چھٹی، سری لنکا 8ویں، بنگلادیش 9ویں اور افغانستان 10ویں پوزیشن پر براجمان ہے۔
